11 мая, Мінск /Кар. БЕЛТА/. Індэкс прамысловага аптымізму расце. Да такой высновы прыйшлі ў Міністэрстве эканомікі пасля вывучэння вынікаў кан'юнктурнага апытання, праведзенага Навукова-даследчым эканамічным інстытутам Мінэканомікі ў мінулым месяцы, паведамляе БЕЛТА.
Згодна з апытаннем, фіксуецца рост пазітыўных настрояў сярод кіраўнікоў прамысловых прадпрыемстваў: індэкс прамысловага аптымізму няспынна расце на працягу паўгода, а таксама адзначаецца павелічэнне загрузкі вытворчых магутнасцей, выпуску прамысловай прадукцыі і ажыўленне попыту на яе.
Расце занятасць - 91 працэнт апытаных паведамілі аб захаванні або павелічэнні колькасці работнікаў.
Большасць апытаных кіраўнікоў (89 працэнтаў) лічаць, што агульнае эканамічнае становішча на прадпрыемствах у бліжэйшы час палепшыцца або не пагоршыцца, і толькі кожны дзясяты даў негатыўны прагноз.
Прагнозныя ацэнкі фінансавых паказчыкаў на май таксама аптымістычныя - 83 працэнты кіраўнікоў лічаць, што прыбытак на прадпрыемствах узрасце або не знізіцца.-0-
