18 мая, Мінск /Кар. БЕЛТА/. Шэдэўры Сяргея Пракоф'ева "Рамэа і Джульета" і "Вайна і мір" прагучаць 18 мая на сцэне Вялікай канцэртнай залы Белдзяржфілармоніі, паведамілі БЕЛТА ў філармоніі.
Гэты канцэрт прадаўжае цыкл вясенніх майскіх канцэртаў, які Дзяржаўны акадэмічны сімфанічны аркестр Беларусі і яго галоўны дырыжор народны артыст Беларусі Аляксандр Анісімаў пачалі 4 мая праграмай "Час слухаць вясну".
Светлая пазітыўная музыка - "Джульета-дзяўчынка", дуэтных сцэн Рамэа і яго каханай, вальс Наташы і Андрэя - гучаць побач з драматычнымі, трагічнымі сцэнамі. Музыка гэтых балета і оперы знаходзіцца на той жа недасягальнай вышыні, што і трагедыя Шэкспіра, і раман-эпапея Талстога.
Сюіта Пракоф'ева "Рамэа і Джульета" даўно ўваходзіць у рэпертуар сімфанічнага аркестра і карыстаецца вялікай папулярнасцю і любоўю публікі. А вось сцэны з оперы "Вайна і мір" у філармоніі прагучаць упершыню. З улікам таго, што ў Вялікім тэатры гэта опера апошні раз гучала ў 1993 годзе, то зразумела асаблівае чаканне і павышаная цікавасць да гэтай філарманічнай праграмы.
Асаблівы каларыт праекту (рэжысёр канцэртна-сцэнічнага выканання - Ірына Крыкунова) надае ўдзел спевакоў-акцёраў - равеснікаў герояў рамана, оперы. Студэнты-вакалісты з захапленнем працуюць над вобразамі Наташы, Андрэя, П'ера, Соні, Мар'і. Дырыжор-пастаноўшчык Аляксандр Анісімаў уключыў у кампазіцыю інструментальныя інтэрлюдыі і сімфанічны фінал з музыкай Пракоф'ева. Неацэнную дапамогу ў рэалізацыі праграмы аказала пастановачная частка Нацыянальнага акадэмічнага драматычнага тэатра імя М.Горкага, мастацкі кіраўнік - Сяргей Кавальчык.-0-
