3 красавіка, Мінск /Кар. БЕЛТА/. Дырыжор Вялікага тэатра Расіі Аляксей Багарад у гутарцы з журналістамі адзначыў, што меў поўнае творчае ўзаемаразуменне з Сімфанічным аркестрам Вялікага тэатра Беларусі, перадае карэспандэнт БЕЛТА.
"Гэта мой першы прыезд у Мінск і першае знаёмства з выдатным калектывам - аркестрам Вялікага тэатра Беларусі. Я, шчыра кажучы, крыху хваляваўся перад першай рэпетыцыяй, але далей, на працягу гэтых дзён, мне здаецца, нам удалося прайсці творчы шлях і мы аб'ядналіся дзеля той музыкі, якую хацелі выконваць, у нас узнікла творчае ўзаемаразуменне", - сказаў Аляксей Багарад.
У канцэрце "Музыка без меж" у Вялікім тэатры Беларусі прагучала цудоўная, геніяльная музыка розных аўтараў, і перш за ўсё Сяргея Рахманінава, чыё 150-годдзе адзначала ўся музычная грамадскасць. У прыватнасці, гучала Другая сімфонія Рахманінава - адна з лепшых сімфоній у сусветнай музыцы.
"Я вельмі рады, што ў Мінску мне давялося ўнесці свой сціплы ўклад у гэтыя святы", - адзначыў Аляксей Багарад.
Гасцей Вялікага тэатра Беларусі сёння сабралі дзве яркія падзеі - 150-годдзе вялікага рускага кампазітара Сяргея Рахманінава і Дзень яднання народаў Беларусі і Расіі.
На сцэне быў прадстаўлены адзін з буйнейшых калектываў Беларусі - Сімфанічны аркестр Вялікага тэатра, якім 1 красавіка кіраваў дырыжор Вялікага тэатра Расіі Аляксей Багарад. У якасці саліста выступаў выдатны віяланчэліст, педагог, дырэктар Санкт-Пецярбургскага Дома музыкі, народны артыст Расіі Сяргей Ралдугін.-0-
